taaza hai us kī mahak raat kī raanī kī tarah
kisī bichhḌe hue lamhe kī nishānī kī tarah
jitnā dekho use thaktī nahīñ āñkheñ varna
ḳhatm ho jaatā hai har husn kahānī kī tarah
reg-e-sahrā kā ajab rañg havāoñ ne kiyā
naqsh sā khiñch gayā dariyā kī ravānī kī tarah
yuuñ guzartā hai vo katrā ke navāh-e-dil se
jaise ye ḳhaak kā ḳhitta bhī ho paanī kī tarah
mujh se kyā kuchh na sabā kah ke ga.ī hai ai 'zeb'
chand hī lafzoñ meñ paiġhām-e-zabānī kī tarah