shahr meñ ham se kuchh āshufta-dilāñ aur bhī haiñ

sāhil-e-bahr pe qadmoñ ke nishāñ aur bhī haiñ

ret ke tuude chamak uThte haiñ jab zulmat meñ

aisā lagtā hai ki kuchh log yahāñ aur bhī haiñ

kaise manzar the ki shīshoñ kī tarah TuuT ga.e

magar āñkhoñ meñ ka.ī ḳhvāb-e-girāñ aur bhī haiñ

bastiyāñ dil kī bhī sunsān paḌī haiñ kab se

ye khañDar hī nahīñ sāyoñ ke makāñ aur bhī haiñ

shab ke sannāTe meñ chaTTānoñ ko dekho ai 'zeb'

tum se begāna-e-fariyād-o-fuġhāñ aur bhī haiñ