khulī thī aañkh samundar kī mauj-e-ḳhvāb thā vo
kahīñ pata na thā us kā ki naqsh-e-āb thā vo
ulaT rahī thiiñ havā.eñ varaq varaq us kā
likhī ga.ī thī jo miTTī pe vo kitāb thā vo
ġhubār-e-rañg-e-talab chhaT gayā to kyā dekhā
sulagtī ret ke sahrā meñ ik sarāb thā vo
sab us kī laash ko ghere hue khaḌe the ḳhamosh
tamām tishna savālāt kā javāb thā vo
vo mere sāmne ḳhanjar-ba-kaf khaḌā thā 'zeb'
maiñ dekhtā rahā us ko ki be-naqāb thā vo