ḳhaak ā.īna dikhātī hai ki pahchān meñ aa

aks-e-nāyāb mire dīda-e-hairān meñ aa

hai sharāra havas-āmāda-e-parvāz bahut

yam-e-zulmāt bulātā hai ki tūfān meñ aa

jagmagātā huā ḳhanjar mire siine meñ utaar

raushnī le ke kabhī ḳhāna-e-vīrān meñ aa

is tarah chhup ki koī DhūñDh nikāle tujh ko

āsmānoñ se utar kar had-e-imkān meñ aa

baiTh jā apne kaTe sar ko liye hāthoñ meñ

thak gayā maiñ bhī yahāñ ganj-e-shahīdān meñ aa

ramna ḳhālī ram-e-āhū-e-ma.ānī se huā

chhup ke baiThā hī thā maiñ 'zeb' niystān meñ aa