maiñ aks-e-ārzū thā havā le ga.ī mujhe

zindān-e-āb-o-gil se chhuḌā le ga.ī mujhe

kyā bach rahā thā jis kā tamāshā vo dekhtā

dāman meñ apne ḳhaak chhupā le ga.ī mujhe

kuchh duur tak to chamkī thī mere lahū kī dhaar

phir raat apne saath bahā le ga.ī mujhe

juz tīrgī na haath lagā us kā kuchh surāġh

kin manziloñ se gard-e-navā le ga.ī mujhe

kis ko gumān thā ki kahāñ jā rahā huuñ maiñ

ik shaam aa.ī aur bulā le ga.ī mujhe

parvāz kī havas ne asīr-e-falak rakhā

ruḳhsat huī to daam meñ Daale ga.ī mujhe

sākit khaḌā thā vaqt magar tesha-zan havā

patthar kī tah se 'zeb' nikāle ga.ī mujhe