bujhte sūraj ne liyā phir ye sambhālā kaisā
uḌtī chiḌiyoñ ke paroñ par hai ujālā kaisā
tum ne bhī dekhā ki mujh ko hī huā thā mahsūs
gird us ke ruḳh-e-raushan ke thā haalā kaisā
chhaT gayā jab mirī nazroñ se sitāroñ kā ġhubār
shauq-e-raftār ne phir paañv nikālā kaisā
kis ne sahrā meñ mire vāste rakkhī hai ye chhāñv
dhuup roke hai mirā chāhne vaalā kaisā
'zeb' maujoñ meñ lakīroñ kī vo ġham thā kab se
gardish-e-rañg ne paikar ko uchhālā kaisā