mauzū-e-suḳhan himmat-e-ālī hī rahegī
jo tarz nikālūñgā misālī hī rahegī
ab mujh se ye duniyā mirā sar maañg rahī hai
kambaḳht mire aage savālī hī rahegī
vo nashsha-e-ġham ho ki ḳhumār-e-mai-e-pindār
dil vāloñ ke chehre pe bahālī hī rahegī
ab tak to kisī ġhair kā ehsāñ nahīñ mujh par
qātil bhī koī chāhne vaalī hī rahegī
maiñ laakh ise taaza rakhūñ dil ke lahū se
lekin tirī tasvīr ḳhayālī hī rahegī
is dil pe Thaharne kā nahīñ 'zeb' koī naqsh
ye aañkh kisī rañg se ḳhālī hī rahegī