havā meñ uḌtā koī ḳhanjar jaatā hai
sar ūñchā kartā huuñ to sar jaatā hai
dhuup itnī hai band huī jaatī hai aañkh
aur palak jhapkūñ to manzar jaatā hai
andar andar khokhle ho jaate haiñ ghar
jab dīvāroñ meñ paanī bhar jaatā hai
chhā jaatā hai dasht o dar par shaam Dhale
phir dil meñ sab sannāTā bhar jaatā hai
'zeb' yahāñ paanī kī koī thaah nahīñ
kitnī gahrā.ī meñ patthar jaatā hai