be-karāñ dasht-e-be-sadā mere
aa khule bāzuoñ meñ aa mere
sāf-shaffāf sabz farsh tirā
gard-ālūda dast o pā mere
sarkash o sar-buland baam tirā
sar-nigūñ shahpar-e-havā mere
be-sutūñ ḳhema-e-sabāt tirā
mahv-e-sahrā nuqūsh-e-pā mere
shab-e-hijrāñ ki lā-zavāl tirī
ġham ki āmāda-e-fanā mere
dasht o dariyā sabhī ḳhamosh hue
zamzama-sanj o ham-navā mere
maiñ payambar tirā nahīñ lekin
mujh se bhī baat kar ḳhudā mere
ek ik taarā jāntā hai mujhe
haiñ sabhī 'zeb' āshnā mere