din hai be-kaif be-gunāhoñ sā
nā-kushāda sharāb-gāhoñ sā
kuchh faqīrāna be-niyāzī bhī
kuchh mizāj apnā bādshāhoñ sā
dil dar-e-mai-kadā sā vā sab par
ghar bhī rakhte haiñ ḳhānqāhoñ sā
sab pe khulte nahīñ magar mire sher
haal hai kuchh tirī nigāhoñ sā
aa gayā hai bayān meñ kyūñkar
pech-o-ḳham saarā terī rāhoñ sā
kuchh nafas meñ sharāb kī sī mahak
kuchh havā meñ nasha gunāhoñ sā
ujlī ujlī pahāḌiyoñ par 'zeb'
rañg utrā hai jalva-gāhoñ sā