mujh se aise vāmānda-e-jāñ ko bistar-vistar kyā
pal do pal ko muuñd luuñ āñkheñ varna ghar-var kyā
chhoḌo kyā ronā le baiThe rañj-o-rāhat kā
qaid hī jab Thahrī hastī to behtar-vehtar kyā
maiñ bhī sar Takrātā phirā huuñ dīvāroñ se bahut
DhūñDh rahe ho is gumbad meñ koī dar-var kyā
āḳhir ko thak-hār ke mujh ko zamīn par aanā hai
zor-o-shor-e-bāzū kaisā shahpar-vahpar kyā
mere qalam hī se jab merā rizq utrā hai
jaanā hai ik kār-e-ziyāñ ko daftar-vaftar kyā
sūrat ek tarāshūñgā to sau rah jā.eñgī
kyuuñ patthar ko subuk karūñ maiñ paikar-vaikar kyā
bālīda bār-āvar honā miTTī ho jaanā
sarsabz zarḳhezī kaisī banjar-vanjar kyā
aab o sarāb o ḳhvāb o haqīqat ek se lagte haiñ
dīda-varī kyā ā.īna kā jauhar-vauhar kyā
mujh ko bahā.e le jaatī hai ḳhud hī mauj mirī
merā rasta rok sakeñge patthar-vatthar kyā
rañg-e-shafaq sabze kā nasha kuchh nahīñ āñkhoñ meñ
duur ḳhalā meñ dekh rahā huuñ manzar-vanzar kyā
merā aur sāhil kā rishta kab kā TuuT chukā
'zeb' kahāñ kā ḳhema-e-kashtī lañgar-vañgar kyā