go mirī har saañs ik paiġhām-e-sarmastī rahī
merī hastī misl-e-bū-e-gul pareshāñ hī rahī
hashr ta.amīr-e-nasheman kā nazar meñ hai magar
itne din merī tabī.at to zarā bahlī rahī
kitnī sub.heñ yaas kī zulmat meñ āḳhir bujh ga.iiñ
sham-e-dil jaltī rahī jaltī rahī jaltī rahī
kis ke roke ruk sakā sail-e-ravān-e-zindagī
phuul khilte hī rahe bijlī chamaktī hī rahī
'zeb' kitnī der kā hañgāma-e-sailāb thā
raunaq-e-dariyā mirī TuuTī huī kashtī rahī