jo tirī mahfil se zauq-e-ḳhām le kar aa.e haiñ
apne sar vo ḳhud hī ik ilzām le kar aa.e haiñ
zindagī ke narm kāñdhoñ par liye phirte haiñ ham
ġham kā jo bār-e-girāñ in.aam le kar aa.e haiñ
vaqt ke nādāñ parinde zo.am-e-dānā.ī ke gird
ḳhūb-sūrat ḳhvāhishoñ ke daam le kar aa.e haiñ
ek manzar par nazar Thahre to Thahre kis tarah
ham mizāj-e-gardish-e-ayyām le kar aa.e haiñ
be-ḳhudī achchhī thī ab to āgahī kī shakl meñ
ġham hī ġham nā-vāqif-e-anjām le kar aa.e haiñ
pattharoñ ke rāste se apne shīshe ke qadam
sa.i-e-lā-hāsil kā ik paiġhām le kar aa.e haiñ
be-amal logoñ se jab pūchho to kahte haiñ kī 'shān'
ham azal se qismat-e-nākām le kar aa.e haiñ