sitam kā tiir jo hai vo tirī kamān meñ hai

jo kah chukā huuñ maiñ vo hī mire bayān meñ hai

maiñ ḳhālī jism hī ghar se nikal ke aayā huuñ

mirī jo jaan hai ab bhī usī makān meñ hai

isī liye to sabhī ham pe ho ga.e haavī

ye phuuT aapsī jo apne ḳhāndān meñ hai

mirī taraf jo ye dekhe to is se baat karūñ

ye merā dost magar jaane kis ke dhyān meñ hai

agar maiñ chāhūñ harīfoñ pe choT bhī kar duuñ

suḳhan kā tiir ik aisā mirī kamān meñ hai

ġhurūr-e-jism pe aur jaan pe are tauba

na jaane miTTī kā putlā ye kis gumān meñ hai

makāñ pe jā ke zarā is ke ThaaT dekh 'nazīr'

gadā bhī aaj kā ye kitnī ān-bān meñ hai