gard hai zar hai siim hai zarra

shakl meñ farq-e-mīm hai zarra

yuuñ to reza hai juz hai sham.a hai

kul meñ lekin jasīm hai zarra

mehr kī raushnī meñ rauzan se

dekho kitnā aziim hai zarra

kahīñ ye shams hai kahīñ ye qamar

jis jagah hai aziim hai zarra

munqasim hone se hai jo ma.azūr

ye vo durr-e-yatīm hai zarra

pūchhiye hurriyat-pasandoñ se

sub.h-e-nau kī nasīm hai zarra

nukta-e-hikmat-o-tadabbur hai

jis jagah bhī muqīm hai zarra

munqasim kaise hoeñ harf bhī qat.a

'hilm' lafz-e-qadīm hai zarra