ḳhud ko kisī kī rāh-guzar kis liye kareñ

tū ham-safar nahīñ to safar kis liye kareñ

jab tū ne hī nigāh meñ rakkhā nahīñ hameñ

ab aur kisī ke zehn meñ ghar kis liye kareñ

kyuuñ tujh ko yaad kar ke gañvā.eñ hasīn shaam

palkoñ ko tere naam pe tar kis liye kareñ

mansūb-e-jāñ ho aur koī paikar-e-ḳhayāl

kar sakte haiñ ye kaam magar kis liye kareñ

kyuuñ chhoḌ deñ na shaam se pahle hī terā shahr

tujh se bichhaḌ ke raat basar kis liye kareñ

kis ke liye charāġh jalā.eñ tamām raat

'nāsik' phir ehtimām-e-sahar kis liye kareñ