ruuh kāġhaz kalām ḳhushbū hai
kyā numāyāñ payām ḳhushbū hai
hai tumhāre ḳhamīr kī ḳhushbū
tum jo kahte ho aam ḳhushbū hai
ham se tohfe meñ phuul kyuuñ kar le
us kā to apnā naam ḳhushbū hai
phuul mausam kī nazar ho ga.e sab
jis ne paayā davām ḳhushbū hai
koī mere qarīb aayā hai
kyuuñ na bhejūñ salām ḳhushbū hai
nisbateñ aap ke pasīne se
kitnī ālī-maqām ḳhushbū hai
baat āġhāz phuul se hogī
baat kā iḳhtitām ḳhushbū hai