qaid meñ gar mujh ko apnī bāñdhtā rah jā.egā

mere rahte vo mujhī ko DhūñDhtā rah jā.egā

yuuñ to badlegā nahīñ kuchh bhī tire jaane ke baad

dāman-e-ḳhvāhish magar haañ bhīgtā rah jā.egā

merī ḳhāmoshī hī de degī use saare javāb

vo savāl apne hī dil se pūchhtā rah jā.egā

kirchiyāñ kuchh ḳhvāboñ kī chubhtī rahegī āñkhoñ meñ

baad tere umr bhar kā rat-jagā rah jā.egā

mubtalā gar ishq meñ ai dil huā to soch le

zindagī bhar zindagī ko DhūñDhtā rah jā.egā