haath phailāo to sūraj bhī siyāhī degā
kaun is daur meñ sachchoñ kī gavāhī degā
soz-e-ehsās bahut hai ise kam-tar mat jaan
yahī sho.ala tujhe bālīda-nigāhī degā
yuuñ to har shaḳhs ye kahtā hai kharā sonā huuñ
kaun kis ruup meñ hai vaqt batā hī degā
huuñ pur-ummīd ki sab āstīñ rakhte haiñ yahāñ
koī ḳhanjar to mirī pyaas bujhā hī degā
shab-gazīda ko tire is kī ḳhabar hī kab thī
din jo aa.egā ġham-e-lā-mutanāhī degā
aa.ina sāf-dil itnā bhī nahīñ ab ki tumheñ
asl chehre ke ḳhat-o-ḳhāl dikhā hī degā
tere hāthoñ kā qalam hai jo asā-e-darvesh
yahī ik din tujhe ḳhurshīd-kulāhī degā