tū hai ma.anī parda-e-alfāz se bāhar to aa

aise pas-manzar meñ kyā rahnā sar-e-manzar to aa

aaj ke saare haqā.eq vāhimoñ kī zad meñ haiñ

Dhālnā hai tujh ko ḳhvāboñ se koī paikar to aa

tū sahī ik aks lekin ye hisār-e-ā.ina

log tujh ko dekhnā chāheñ barūn-e-dar to aa

zā.iqa zaḳhmoñ kā yuuñ kaise samajh meñ aa.egā

pheñknā hai band paanī meñ koī patthar to aa

jism-e-ḳhākī tujh ko shīshe kī havelī hī sahī

ai charāġh-e-jāñ kabhī fānūs ke bāhar to aa

is jagah āhañg meñ Dhaltī haiñ dil kī dhaḌkaneñ

aa mire gahvāra-e-ehsās ke andar to aa

bār-hā jī meñ ye aa.ī umr-e-rafta se kahūñ

shaam hone ko hai ai bhūle musāfir ghar to aa