dekh kar merī anā kis darja hairānī meñ hai

us ne samjhā thā ki sab kuchh bāb-e-imkānī meñ hai

mujh ko ġham de de ke ḳhush thā vo magar ye kyā huā

vaqt ke hāthoñ vahī ġham kī farāvānī meñ hai

kis ko kis ko ḳhush rakhe vo kis se jhagḌā mol le

faisla hai us ke hāthoñ meñ to hairānī meñ hai

har ghaḌī ab hasratoñ kī laash detī hai dhuāñ

ik ajab shamshān mere dil kī vīrānī meñ hai

maiñ bhī tanhā is taraf huuñ vo bhī tanhā us taraf

maiñ pareshāñ huuñ to huuñ vo bhī pareshānī meñ hai

barf bhī sīmāb bhī sāhil bhī hai girdāb bhī

ye tazād-e-ḳhāsiyat ik shakl-e-insānī meñ hai