ghuTī ghuTī sī fazā meñ shaguftagī to milī
chaman meñ shukr hai hañstī koī kalī to milī
balā se barq girī mere āshiyāne par
añdherī raat ke rahrav ko raushnī to milī
rahā na shikva-e-be-chārgī ki ġhurbat meñ
qadam qadam pe sahāre ko be-kasī to milī
hamāre dil se koī pūchhe qadr us mai kī
jo ek buuñd sahī vaqt-e-tishnagī to milī
sambhal sambhal ke mire dil ko toḌne vaale
tirī jafā meñ mohabbat kī chāshnī to milī
kisī kā bhī na rakhā thā ḳhirad ne apne sivā
junūñ kī raah pe chalne se āgahī to milī
na thā nasīb meñ gar sīm-o-zar to kyā 'sāqī'
dar-e-habīb kī ham ko gadāgarī to milī