naaz kartā hai jo tū husn meñ yaktā ho kar

maiñ bhī nāzāñ huuñ tirā āshiq-e-shaidā ho kar

maiñ na samjhā thā ki ashkoñ se uThegā tūfāñ

chand qatroñ ne Duboyā mujhe dariyā ho kar

chashm-e-bīmār jo pahle thī vahī ab bhī hai

kuchh banā.e na banī tum se masīhā ho kar

kis ke ruḳhsār dam-e-sair-e-chaman yaad aa.e

phuul āñkhoñ meñ khaTakne lage kāñTā ho kar

dard thā dil meñ to jiine kā maza miltā thā

ab to bīmār se bad-tar huuñ maiñ achchhā ho kar

daam se chhūT ke bhī merī asīrī na ga.ī

zulf-e-sayyād gale paḌ ga.ī phandā ho kar

chhup ke rahnā hai jo sab se to ye mushkil kyā hai

tum mire dil meñ raho dil kī tamannā ho kar

kyā sitam hai shab-e-vāda vo hinā malte haiñ

rañg laa.e na kahīñ ḳhūn-e-tamannā ho kar

dahan-e-yār kī tārīf jo kī maiñ ne 'jalīl'

uḌ gayā tā.ir-e-mazmūñ mirā anqā ho kar