jīte-jī dukh sukh ke lamhe aate jaate rahte haiñ
ham to zarā sī baat pe pahroñ ashk bahāte rahte haiñ
vo apne māthe par jhūTe rog sajā kar phirte haiñ
ham apnī āñkhoñ ke jalte zaḳhm chhupāte rahte haiñ
soch se paikar kaise tarshe soch kā ant nirālā hai
ḳhaak pe baiThe āḌe-tirchhe naqsh banāte rahte haiñ
sāhil sāhil daar saje haiñ mauj mauj zanjīreñ haiñ
Dūbne vaale dariyā dariyā jashn manāte rahte haiñ
'aḳhtar' ab insāf kī āñkheñ zar kī khanak se khultī haiñ
ham pāgal haiñ lohe kī zanjīr hilāte rahte haiñ