hai yaad josh ye jis vaqt ashk-bārī thī
to ek nahr usī āstīñ se jaarī thī
zamīn-e-bāġh pe girte haiñ TuuT kar taare
sitāra-dār qabā us ne kyuuñ utārī thī
maiñ āñkheñ band kiye thā vo dekhte īdhar
jise vo samajhte the ġhaflat vo hoshiyārī thī
lahū ke ashk jo Tapke to khul gayā ye raaz
nigah thī dil meñ ki utrī huī kaTārī thī
milī hai dekhiye ye sub.h-e-hashr se jā kar
lahad kī raat na thī shām-e-ġham hamārī thī
nahīñ haiñ ham to chamaktā hai subah kā taarā
ye raat vo thī jo bīmār-e-ġham pe bhārī thī