din le ke jā.ūñ saath use shaam kar ke aa.uuñ
be-kār ke safar meñ koī kaam kar ke aa.uuñ
be-mol kar ga.iiñ mujhe ghar kī zarūrateñ
ab apne-āp ko kahāñ nīlām kar ke aa.uuñ
maiñ apne shor-o-shar se kisī roz bhaag kar
ik aur jism meñ kahīñ ārām kar ke aa.uuñ
kuchh roz mere naam kā hissa rahā hai vo
achchhā nahīñ ki ab use bad-nām kar ke aa.uuñ
'anjum' maiñ bad-duā bhī nahīñ de sakā use
jī chāhtā to thā vahāñ kohrām kar ke aa.uuñ