ajab kashākash-e-bīm-o-rajā hai tanhā.ī

tire baġhair tirā sāmnā hai tanhā.ī

na.e dinoñ kī salībeñ ga.e dinoñ ke mazār

azaab ḳhud se mulāqāt kā hai tanhā.ī

fazā meñ haiñ kisī tūfān-e-tund ke āsār

safar tavīl hai aur rāstā hai tanhā.ī

bahut udaas hai dil dostoñ kī mahfil meñ

har ek aañkh meñ chehra-numā hai tanhā.ī

shagufta phūloñ kā gul-dasta sohbat-e-yārāñ

bikharte pattoñ kā ik Dher sā hai tanhā.ī

maiñ āftāb ko kaise dikhā.ūñ tārīkī

tujhe maiñ kaise batā.ūñ ki kyā hai tanhā.ī

ajab sukūn thā shab āñsuoñ kī bārish meñ

vo ġham-gusār vo dard-āshnā hai tanhā.ī

vo ḳhvāb kyā thā ki jis kī hayāt hai ta.abīr

vo jurm kyā thā ki jis kī sazā hai tanhā.ī

nahīñ mile the to tanhā.ī kis qadar thī 'ziyā'

vo mil ke bichhḌe to us se sivā hai tanhā.ī