Akram Naqqash

khuli aur band aankhon se use takta raha main bhi

Akram Naqqash

khulī aur band āñkhoñ se use taktā rahā maiñ bhī

tirī duniyā ke pīchhe bhāgtā phirtā rahā maiñ bhī

mirī āvāz pichhlī raat tujh tak kaise aa paatī

kisī gahre kueñ meñ raat bhar sotā rahā maiñ bhī

ba-zāhir dekhtī āñkheñ ba-zāhir jāgtī rūheñ

ba-zāhir in sabhoñ ke saath jiitā rahā maiñ bhī

maiñ huuñ is kārsāz-e-be-kasāñ dastaras meñ yuuñ

vo jis sāñche meñ bhī Dhālā kiyā Dhaltā rahā maiñ bhī

badan malbūs meñ sho.ala ik larzāñ qarīn-e-jāñ

dil-e-ḳhāshāk bhī sho.ala huā jaltā rahā maiñ bhī

hai jis rāh-e-yaqīñ par gāmzan pā-e-ḳhirad har-dam

usī rāh-e-gumāñ par muddatoñ chaltā rahā maiñ bhī

Top Urdushayar.com