harīf-e-gardish-e-ayyām to bane hue haiñ

vo ā.eñge nahīñ ā.eñge ham saje hue haiñ

baḌā hī ḳhushiyoñ bharā hañstā-bastā ghar hai mirā

isī liye to sabhī qumqume jale hue haiñ

vo ḳhud-pasand hai ḳhud ko hī dekhnā chāhe

so us ke chāroñ taraf aa.ine lage hue haiñ

ye kis hasīñ kī savārī guzarne vaalī hai

jo kā.enāt ke sab rāste saje hue haiñ

mahak rahī hai fazā us badan kī ḳhushbū se

chaman harā-bharā hai phuul bhī khile hue haiñ

maiñ us kī samt meñ ḳhud rāsta banā.ūñgā

vagarna us kī taraf rāste bane hue haiñ