mujh meñ paivast ho chukī ho tum
mere andar kī ḳhāmushī ho tum
kyā faqat shauq rah gayā huuñ maiñ
kis tarah baat kar rahī ho tum
ḳhaas ye hai ke maiñ nahīñ badla
aur dilchasp ke vahī ho tum
itnā andāza-e-safar hai mujhe
āḳhirī moḌ pe khaḌī ho tum
kis qadar chīḳhne lagā huuñ maiñ
kitnī ḳhāmosh ho ga.ī ho tum
ḳhvāb meñ kyā dikhā.ī paḌtā hai
kis ke kāñdhe pe so rahī ho tum
ek dhakkā sā lag gayā hai mujhe
sun liyā hai ke ro rahī ho tum