yā tirī aarzū sā ho jā.ūñ

yā tirī aarzū kā ho jā.ūñ

mire kānoñ meñ jo tū kun kah de

maiñ tasavvur sā tirā ho jā.ūñ

mujh se ik baar zarā mil aise

maiñ tire ghar kā pata ho jā.ūñ

tū bhī aa jaanā kahīñ rakh ke badan

jism se maiñ bhī judā ho jā.ūñ

toḌ kar maaTī ye merī phir se

yuuñ banāo ki nayā ho jā.ūñ

ishq kī rasm yahī hai baaqī

maiñ bhī ik baar ḳhafā ho jā.ūñ

āshnā.ī hai suḳhan-goī bhī

aur kitnā maiñ burā ho jā.ūñ