jaise kisī ko ḳhvāb meñ maiñ DhūñDhtā rahā

daldal meñ dhañs gayā thā magar bhāgtā rahā

bechain raat karvaTeñ letī thiiñ baar baar

lagtā hai mere saath ḳhudā jāgtā rahā

apnī azaañ to koī muazzin na sun sakā

kānoñ pe haath rakhe hue boltā rahā

saa.at duā kī aa.ī to hasab-e-nasīb maiñ

ḳhālī hatheliyoñ ko abas ghūrtā rahā

us kī nazar ke sañg se maiñ ā.ina-misāl

TuuTā to TuuT kar bhī use dekhtā rahā

insāñ kisī bhī daur meñ mushrik na thā kabhī

patthar ke naam par bhī tujhe pūjtā rahā