vo dilkashī vo tasavvur kisī nazar meñ nahīñ
tumhāre jaisī koī shai hamāre ghar meñ nahīñ
ye zindagī bhī ajab chiiz hai ḳhudā kī panāh
ise sambhāl ke rakhnā mire hunar meñ nahīñ
ye kis kī aah kī phunkār hai ki ab ke baras
tumhāre hoñToñ kī koī duā asar meñ nahīñ
maiñ ek umr se huuñ shāmil-e-safar logo
magar ye kyā ki mire paañv rahguzar meñ nahīñ
tamām kutub-o-rasā.il varaq varaq dekhe
bahut dinoñ se 'asad' tum kisī ḳhabar meñ nahīñ