hañsī un kī gul aur chaman jānte haiñ

ye lab muskurāne kā fan jānte haiñ

na.e log ho tum na.ī baat jaano

mirā haal ahal-e-kuhan jānte haiñ

mubārak ho tum ko hisār-e-ḳhamoshī

zabāñ vaale tarz-e-suḳhan jānte haiñ

lahū ke jo qatre bahā.e haiñ maiñ ne

mire jism ke pairahan jānte haiñ

tum hī sāhab-e-saltanat to nahīñ ho

hukūmat ke ham bhī chalan jānte haiñ

shab-o-roz mere guzarte haiñ kaise

'asad' ye to ahl-e-vatan jānte haiñ