bhare to kaise parinda bhare uḌaan koī
nahīñ hai tiir se ḳhālī yahāñ kamān koī
thiiñ āzmā.isheñ jitnī tamām mujh pe huiiñ
na bach ke jā.egā ab mujh se imtihān koī
ye totā mainā ke qisse bahut purāne haiñ
hamāre ahd kī ab chheḌo dāstān koī
na.e zamāne kī aisī kuchh āñdhiyāñ uTThīñ
rahā safīne pe baaqī na bādbān koī
bikhar ke rah ga.iiñ rishtoñ kī saarī zanjīreñ
bachā sakā na rivāyat ko ḳhāndān koī
'zakī' hamārā muqaddar haiñ dhuup ke ḳheme
hameñ na raas kabhī aayā sā.ebān koī