ghar yaar kā ham se duur paḌā ga.ī ham se rāhat ek taraf
dil ek taraf aah ek taraf milne kī hasrat ek taraf
hai maut kā rañg mirā jīvnā jiyūñ dhundlā charāġh huuñ maiñ
sakrāt kī zulmat ek taraf hastī kī tohmat ek taraf
jī aa rahā dīda-e-tar meñ mujhe dam lene kī taab nahīñ
zo.af ek taraf dard ek taraf aur kāhish-e-tāqat ek taraf
juuñ musht-e-sipand mire a.azā jal dil ke añgāre se uḌte haiñ
dāġhoñ kā mahshar ek taraf nāloñ kī qayāmat ek taraf
dil haat de yaar ke kyūñke liyūñ pher aah jahāñ kī malāmat se
jī leve hai ġhairat ek taraf maare hai muravvat ek taraf
ġhul hai pathrāv hai laḌkoñ kā ik aah kā laTh hai haat mire
hai saarā aalam ek taraf dīvāna-e-'uzlat' ek taraf