chhoḌ kar mujh ko chalī ai bevafā maiñ bhī to huuñ
le ḳhabar merī bhī ai teġh-e-adā maiñ bhī to huuñ
pī rahe haiñ sab piyālī par piyālī bazm meñ
merī baarī bhī to aa.e sāqiyā maiñ bhī to huuñ
zikr jab hūr-o-parī kā sāmne un ke huā
pahle to sunte rahe vo phir kahā maiñ bhī to huuñ
duḳht-e-raz zāhid se bolī mujh se ghabrāte ho kyuuñ
kyā tumhīñ ho pāk-dāman pārsā maiñ bhī to huuñ
ḳhaas zāhid ke liye jannat to ho saktī nahīñ
āḳhir ik banda 'sharaf' allāh kā maiñ bhī to huuñ