tum ne pūchhā nahīñ kabhī ham ko
tum se ummīd ye na thī ham ko
rote dekhā mujhe to farmāyā
aa na jaa.e kahīñ hañsī ham ko
jis nazar se ki chāhte the ham
tum ne dekhā nahīñ kabhī ham ko
haa.e kahnā kisī kā jaate hue
kījiye ruḳhsat hañsī ḳhushī ham ko
o javānoñ kī jaan ham se hijāb
yaad hai terī kam-sinī ham ko
haa.e kyā bhole-pan se kahte haiñ
ghūrtī kyuuñ hai aarsī ham ko
muddatoñ meñ huzūr-e-yār 'sharaf'
aaj laa.ī hai be-ḳhudī ham ko