rutoñ ke rañg badalte hue bhī banjar hai

vo ek ḳhaas ilāqa jo dil ke andar hai

ghaḌī ghaḌī mirī ā.ankhoñ meñ uḌ rahī hai dhuul

sadī sadī kā mirī raah meñ samundar hai

bujhā bujhā huā rahtā huuñ apne ḳhvāboñ meñ

dhuāñ dhuāñ sā mire jāgne kā manzar hai

ajiib ḳhvāb sā dekhā ki puure dariyā meñ

koī jahāz kahīñ hai na koī lañgar hai

badan pe TuuT bikharne ko hai kahīñ na kahīñ

hirās-o-ḳhauf kā saaya jo mere sar par hai

maiñ kis kī khoj meñ yuuñ hī bitā rahā huuñ janm

chhupā huā mire saa.e meñ kis kā paikar hai

sunā rahī hai havā apne hī safar-nāme

ajiib shor ghane jañgaloñ ke andar hai