dard meñ lazzat bahut ashkoñ meñ ra.anā.ī bahut
ai ġham-e-hastī hameñ duniyā pasand aa.ī bahut
ho na ho dasht-o-chaman meñ ik ta.alluq hai zarūr
bād-e-sahrā.ī bhī ḳhushbū meñ uThā laa.ī bahut
maslahat kā jabr aisā thā ki chup rahnā paḌā
varna uslūb-e-zamāna par hañsī aa.ī bahut
be-sahāroñ kī mohabbat be-navāoñ kā ḳhulūs
aah ye daulat ki insānoñ ne Thukrā.ī bahut
be-ḳhayālī meñ bhī kitne fāsle tai ho ga.e
be-irāda bhī ye duniyā duur le aa.ī bahut
apnī fitrat meñ bhī raushan hoñge lekin ai 'zamīr'
merī rātoñ se bhī tāroñ ne chamak paa.ī bahut