ḳhulāsa ye mire hālāt kā hai

ki apnā sab safar hī raat kā hai

ab ik rūmāl mere saath kā hai

jo merī vālida ke haath kā hai

anā kyā ijz ko girdāb samjho

baḌā gahrā samundar zaat kā hai

ḳhudā ash.ār-e-rasmī se bachā.e

ye qatl-e-ām sachchī baat kā hai

tapish kitnī hai maañ ke āñsuoñ meñ

ye paanī kaun sī barsāt kā hai

mujhe behtar hai kachchī qabr apnī

kisī gumbad se jo ḳhairāt kā hai