sab kī ā.ankhoñ meñ jo samāyā thā
kaun thā vo kahāñ se aayā thā
kis ne kī aaj pursish-e-ahvāl
koī apnā thā yā parāyā thā
miT ga.e ham to ye huā ma.alūm
bhuul kar koī muskurāyā thā
ek lazzat thī ḳhud-farebī meñ
varna kis ne fareb khāyā thā
aa ga.iiñ yaad phir vahī bāteñ
kal ba-mushkil jinheñ bhulāyā thā
sab the āseb-e-bazm ke maare
ham pe tanhā.iyoñ kā saayā thā
umr guzrī 'sahar' mohabbat meñ
ham ne dil kuchh ajiib paayā thā