zamīñ se tā-falak chhā.ī huī hai raushnī-e-lā

ye saarā shahr hai merī nazar meñ aañkh kā dhokā

samundar meñ nadī ban kar utar jā.ūñ kahāñ tak maiñ

nigal jā.egā paanī ek din saarā badan merā

ugal degī zamīñ sab aag ik din apne andar kī

rakhe kab tak bhalā ye bojh siine par pahāḌoñ kā

nagar ko log khultā sā ik ā.īna samajhte the

magar mujh ko nazar aayā koī chehra na apnā sā

use meñ DhūñDhtā thā raat kī gahrī ḳhamoshī meñ

na jaane kis tarah phir shahr meñ merā huā charchā