mirī nigāh kahāñ dīd-e-husn-e-yār kahāñ
ho e'tibār to phir tāb-e-intizār kahāñ
diloñ meñ farq huā jab to chaah pyaar kahāñ
chaman chaman hī nahīñ aa.egī bahār kahāñ
jise ye kah ke vo hañs deñ ki qissa achchhā hai
vo raaz khul ke bhī hotā hai āshkār kahāñ
umañg thī ye javānī kī yā koī āñdhī
milā ke ḳhaak meñ ham ko ga.ī bahār kahāñ
umīd-vār banāne se mudda.ā kyā thā
jab aas tum ne dilā dī to ab qarār kahāñ
milī hai is liye do-chār din kī āzādī
ki sarf kartā hai dekheñ ye iḳhtiyār kahāñ
ye shauq le ke chalā hai chaman se shakl-e-nasīm
ki dekheñ miltī hai jaatī huī bahār kahāñ
hai ek shart vafā kī vo qaid-e-be-zanjīr
sab iḳhtiyār haiñ aur kuchh bhī iḳhtiyār kahāñ
miTe nishāñ pe nazar kar ke ro jise chāhe
tire sitam kī hai turbat mirā mazār kahāñ
tum aisā ahd-shikan 'ārzū' sā nā-ummīd
kaho jo sach bhī to aatā hai e'tibār kahāñ