rāsta ye batā rahā hai mujhe
ve bahut DhūñDhtā rahā hai mujhe
paas rah kar na paas aayā to
duur se kyā bulā rahā hai mujhe
jhāñk kar dekh apnī āñkhoñ meñ
chhup ke tū dekhtā rahā hai mujhe
bhuul baiThā huuñ us kī sab bāteñ
ve magar yaad aa rahā hai mujhe
kyā batā.ūñ chhupā hai mujh meñ kaun
kaun mujh meñ chhupā rahā hai mujhe
maiñ ne chāhā sunā.ūñ kuchh dil ko
dil bhī apnī sunā rahā hai mujhe
maiñ jahāñ bhī gayā tujhe paayā
tū bhī kyā yuuñ hī pā rahā hai mujhe
kuchh nazar meñ nahīñ rahā 'momin'
hijr kyā kyā dikhā rahā hai mujhe