zindagī ye to nahīñ tujh ko sañvārā hī na ho
kuchh na kuchh ham ne tirā qarz utārā hī na ho
dil ko chhū jaatī hai yuuñ raat kī āvāz kabhī
chauñk uThtā huuñ kahīñ tū ne pukārā hī na ho
kabhī palkoñ pe chamaktī hai jo ashkoñ kī lakīr
sochtā huuñ tire āñchal kā kinārā hī na ho
zindagī ek ḳhalish de ke na rah jā mujh ko
dard vo de jo kisī tarah gavārā hī na ho
sharm aatī hai ki us shahr meñ ham haiñ ki jahāñ
na mile bhiik to lākhoñ kā guzārā hī na ho