mujhe kisī ne batāyā ḳhudā hai mere saath
maiñ kyā batā.ūñ use aur kyā hai mere saath
tujhe yaqīñ nahīñ aa.egā par haqīqat hai
ye tū nahīñ hai koī dūsrā hai mere saath
ye mushkilāt bhī ab mere saath rahtī haiñ
ye jāntī haiñ ki mushkil-kushā hai mere saath
maiñ kyā batā.ūñ tujhe yaad kyā dilā.ūñ tujhe
tū jāntā hai jo tū ne kiyā hai mere saath
agar vafā ko batā.ūñ vafā bhī chīḳh paḌe
vafā ke naam pe jo kuchh huā hai mere saath
sitam to ye hai ki maiñ ne use bhī chhoḌ diyā
jo sab ko chhoḌ ke tanhā khaḌā hai mere saath
kisī se koī shikāyat nahīñ mujhe 'momin'
jo honā chāhiye vo ho rahā hai mere saath