mirī nazar ki tarah dil parind ojhal hai

har ek ḳhvāb kā hāsil parind ojhal hai

shajar jo kah na sake āsmāñ vahī sun le

yaqīñ hai vahm kī manzil parind ojhal hai

shafaq shafaq vahī surḳhī uḌaan kī ta.abīr

ufuq ufuq vahī mahfil parind ojhal hai

sadā meñ samt nahīñ bāzgasht lā-mahdūd

safar kī shart meñ shāmil parind ojhal hai

bhañvar kā kaam jazīre ko varġhalānā thā

dhuāñ dhuāñ lab-e-sāhil parind ojhal hai