dil-e-betāb kā payām liyā

phir kisī ne mirā salām liyā

ruuTh kar ham se tū ne ai zālim

kis ḳhatā kā hai intiqām liyā

ho ke majbūr josh-e-ulfat se

ham ne dāman kisī kā thaam liyā

phuul jhaḌne lage zabāñ se mirī

jab kisī gul-badan kā naam liyā

kaam aa.e na aql-o-hosh jahāñ

ham ne dīvāngī se kaam liyā

Dagmagāte hue mire dil ko

us hasīñ ajnabī ne thaam liyā

shiddat-e-ranj-o-ġham meñ ai 'nayyar'

ham ne jām-o-subū se kaam liyā