na socheñ ahl-e-ḳhirad mujh ko āzmāne ko
maiñ jāntā huuñ bahut aql ke fasāne ko
nahīñ qafas se nikalne kī aarzū sayyād
dikhā de ek nazar mere āshiyāne ko
asiir kar ke qafas meñ mujhe ye hairat hai
vo kah rahe haiñ mujhī se chaman bachāne ko
sulūk ahl-e-chaman se ye bāġhbāñ ne kiyā
qafas samajhne lage haiñ sab āshiyāne ko
batāo tum ko ye kyā ho gayā hai ahl-e-chaman
jalā rahe ho jo ḳhud apne āshiyāne ko
jafā-o-zulm ke is tund tez tūfāñ meñ
vo mujh se kahte haiñ sham-e-vafā jalāne ko
girā rahe haiñ musalsal vo bijliyāñ 'dānish'
batāo kaise bachāoge āshiyāne ko